ازاى تذاكر؟ اسهل مايكون.

ازاى تذاكر؟ اسهل مايكون.

1-الاستعانة بالله (قول استعنت بك يارب)


2-لازم تحدد هدف لك من مذاكرتك (عاوز تنجح بس...تبقي متفوق.....تبقي مهندس او طبيب )


3-ضروري جدا الانتباه والتركيز اثناء المذاكرة ( يعني تذاكر في مكان انت راضي عنه ذي ما بتظبط مكانك ومحدش يقعد فية قبل الماتش بساعة!!


4-تحديد وقت للمذاكرة بل تخصيص احسن وقت ومكان كمان مش ضروري الاوبرج او الشيراتون بل ما هو متاح وموجود المهم تذاكر وانت راضي ومرتاح


5-نظم كمان وقت للراحة ووقت للهواية اللي بتحبها بس ما تنساش ان وظيفتك انك طالب وصنعتك المذاكرة


6-بلاش مذاكرة علي السرير او ما شابة لأنك ممكن تنام وأنت قاعد .. بالك وأنت ممدد ؟ خليك في وضع الجدية ذي جديتك امام فيلم اكشن اوتمثيلية حرشة – تذكر تفوق مش نجاح بس


7-لا ترغم نفسك علي المذاكرة بس لاحظ انها مهمة لانها وسيلتك للحصول علي فرحة النجاح ونشوة التفوق وافتكر احساسك عند الفوز في دور بلياردو او ماتش بلاي استيشن** يبقي تذاكر ونفسك راضية لانك لازم وضروري تذاكر ,,


8-ابتدي بالمادة السهلة عليك اكيد اللي بتحبها بس ما تعدليش فيها اليوم كلة وتقولي مثلا يعني الرسم داخل في المجموع !!


9-مهم جدا تعمل جدول للمذاكرة يومي يحتوي علي ثلاث مواد علي الاقل وقولنا وبناكد ابتدي بالمادة السهلة ..ثم المادة الصعبة او الرخمة من وجهة نظرك لانها بعد اسبوع فقط بفقط بإذن الله من الدوام علي مذاكرتها يوميا هتبقي سهلة ويمكن هي اللي تبدي بيها ان شاء الله


10-خليك واثق من نفسك.. خليك واثق من نفسك دائما السهل هيجيب الصعب بعون الله


11-بخصوص المادة الصعبة عليك وعلي كام واحد من صحابك اللي بيشعشعو الفكرة في دماغك قسمها ابواب والباب قسمة فصول والفصل قسمة عناصر والعنصر قسمة كام نقطة كمان ... استني كله هتلاقيه متقسم وجاهز في الفهرس عندك ؛ كل اللي عليك تخلص لك كام نقطة كل يوم وعلي اخر الاسبوع هتكون قطعت شوط محترم فيها واصبر شوية (الدنيا اتعملت في سبع ايام)


12-احنا قاصدين خير ان شاء الله غرضنا النجاح والتفوق كمان.. صح؟ ووسيلتنا المذاكرة ..صح ؟ يبقي مهم انك تستخدم اكثر من حاسة اثناء المذاكرة (صوتك ,, جنب عينيك ،، بالاضافة لقلمك خلصة ياعم وهاتلك غيرة)


13-نام كويس ؛ مش بطول مدة النوم ولا كثرة عدد مرات النوم في اليوم لكمن نام وارتاح فاهمني لجل تجدد نشاطك وتكون قادر علي النظام والانتظام في المذاكرة


14-من فضلك لا تتعلل بالاعذار ؛ النهاردة الجو حار قوي ، خدوا مني المكان اللي بحب اقعد فيه ، زهقان ومش عارف ليه او حتي عارف !؟ واحنا فاهمين بعض كويس؟؟ افكرك وانت سيد العارفين انت وظيفتك انك طالب وصنعتك المذاكرة وهدفك النجاح وان شاء الله التفوق


15-حاول تتعلم من غلطك ومن اخطاء غيرك (مش واحد اتلسع من سلك كهرباء اقوم اروح احضن العمود )وخليك متفائل دائما، سيدنا النبي محمد علية الصلاة والسلام بيقول *بشروا ولا تنفروا*


16-حلو قوي انك تحدد لك مثل اعلي المحترمين كثير والقدوة الصالحة متوفرة بفضل الله خليك في القريبين منك كردون العائلة مثلا يعني


17-زي ما أبتدينا بالاستعانة بالمولي عز وجل خليك واثق في الله وانتظم في صلاتك وداوم عليها هتنتظم عيشتك و بعون الله هتحقق تفوق بعد نجاح .

يارب اكون قدمت شئ .. فى إفاده فعلا .. ويساعد ناس كتير