كل على ضرسك الي بيوجعك

كل على ضرسك الي بيوجعك

كنت بلعب في 9 او 10 سنين لما صاحب بابا الله يرحمه جيه زارنا في 6 اكتوبر ، كان دكتور سنان ، اول ماشافني قالي تعالى مسكني فتح بوقي وبص جوا قالي ايه ده ايه ده ، انت ضرسك بيوجعك ؟ قولتله لا ! قالي ازاي ، ده مليان تسوس ، لازم تيجيلي المستشفى ، ماما مصدقتنيش ومحدش صدقني "نظام انت هتعرف اكتر من الدكتور ؟" في نفس اليوم ده كنت بجيب سندوتشات بمصروفي جاي اضغط واكلها حسيت باحساس صعب ومؤلم جدا في ضرس فكي اليمين وتعبت ومعرفتش انام في نفس اليوم ، تاني يوم امي خدتني ورحنا مستشفى عين شمس تقريبا اسمها ، وقابلته وبدا يقول ده لازم حشو ولازم ولازم ، قالتله في انهي ضرس يادكتور ، قالها في ضرس فكه الشمال ، قالتله بس هو بيشتكي من اليمين ، بص كده وقالي لا سليم ، في نفس اليوم حسيت كإن الالم اتنقل للشمال واليمين بقى كويس ، وبدأت رحلتي مع دكاترة السنان من حشو لطربوش لحركات وفي الاخر شيلته ، وبسبب الالم لما لاقيت ضرسي اليمين بيوجعني بجد روحت شيلته لاني خايف من التعذيب الي ملهوش
لازمة مدام كده كده هشيله في الاخر.

تخيل طفل عنده 10 سنين وخالع ضرسين مفيش امل انهم يطلعوا تاني ، بعديها بكذا سنة حصلي مشكلة في ضرس تالت واتدهورت حالته واشتغلت على نفسي بالتنويم الايحائي لحد الحمد لله ما اختفى الالم منه والغريب اني بشوفه كل يوم بيتدهور اكتر واكتر لحد ماثبت على شكل معين بس مفيش الم تماما ، لحد اسبوع فات ، لما لاقيت نفسي كل مرة اشرب فيها مية وكإن مدينة ألم بتيجي تسكنه ، فكل مرة مكنتش بكمل شرب ، لحد ماقررت حاجة غريبة اوي ..

"شربت على الضرس" وشربت المياة ، وكنت بموت والمية بتلمس ضرسي كان الالم بيكبر اكتر واكتر ، اتعودت اعمل كده كذا مرة وكل مرة كنت بشغل تركيزي على لون الكوباية او شكل الحيطة او اي فكرة تانية ..

امبارح صحيت من النوم دخلت الحمام ، غسلت وشي ، اتوضيت ، صليت ، اتفرجت على التلفزيون شوية ، روحت جبت الفطار ، طلعت كلت وليا ازازة بتاعتي شربت منها و قومت فتحت الكمبيوتر وقعدت عالجهاز وفتحت الماسينجر و.... استنى استنى ، ارجع تاني كده

و رجنيساملا تحتف زاهجلاع تدعقو رتويبمكلا تحتف تموقو "شربت منها"!!!!

شربت ازاي؟ اكتشفت ان ضرسي موجعنيش تماما وكاني مشربتش حاجة ، ببص على الازازة بتاكد لاقيتها النص وانا شربت وكانت ساقعة والمفروض ده يتعبني اكتر ، قومت شربت تاني موجعنيش !!! قعدت اقول ايه ده انا حصلي ايه ، هو انا اتشليت ولا ايه !!!! ، خبطت وشربت موجعنيش ، دوست عليه موجعنيش شربت وكلت موجعنيش..

ابتسمت ساعتها وقولت والله عيب عليك ، تعلم الناس التنويم الايحائي والضمني وانت مش راضي تصدق ان تقنية بسيطة عالجت الالم ، وافتكرت القول الي بيقول "اذا هبت أمرا فقع فيه" يعني لو خفت من حاجة ، اعملها مهما كانت ..

الضرس الي كان بيوجعني ده كان تحدي ، طول الوقت كنت بحاول ابعتله واسطة "ادوية" علشان تكلمه وتطلب منه ميوجعنيش تاني ، كنت بطلب منه دايما وبستعطفه انه ميوجعنيش ، ومكنش بيرضى ، وكان الالم بيكبر اكتر ، لحد ماقررت اني اواجهه ، ساعتها بس رجع عن الي كان فيه ، وبدأت اتحكم في الدفة من جديد ، في اللحظة الي واجهته فيها وفهم اني مش بطلب منه او اني ببعتله وسايط ، استجاب .

الموضوع ده ممكن دايما تطبقه مش بس على وجع ضرسك بس ممكن كمان على اي حاجة انت متخيل انها بتشكل تهديد بالنسبة لك ، خليني اقولك ان المواجهة لوحدها انتصار حتى لو مقولتش حاجة بس وجودك دليل على انك على حق ومدام واجهت صدقني عقلك وجسمك وكل خليه في جسمك هتقوم بالباقي ، كل الي عليك تعمله هو انك تواجه وتحدد بالظبط انت عايز ايه وتأمر بيه ، دنيتك مملكتك ومينفعش العبيد يحركوك ، انت ملك جسمك وعقلك وخيالك فأمر بالمعروف وانهى عن المنكر حتى لو كان فيك انت شخصيا ..

لو فيه حاجة انت عايز تعملها من زمان بس خايف من ردود افعال شخص ما ، اعملها لانك لو عملتها وفشلت فعلى الاقل هتقول انا حاولت ، ولو معملتهاش هتعيش عمرك ندمان انك محاولتش ..


منقول للفائدة